मी फुल तृणातील इवले

जरी तुझिया सामर्थ्याने
ढळतील दिशाही दाही
मी फुल तृणातील इवले
उमलणार तरीही नाही
                    
शक्तीने तुझिया दिपुनी
तूज करतील सारे मुजरे
पण सांग कसे उमलावे
ओठातील गाणे हसरे

जिंकील मला दवबिंदू
जिंकील तृणाचे पाते
अन् स्वतःस विसरून वारा
जोडील रेशमी नाते

कुरवाळीत येतील मजला
श्रावणातल्या जलधारा
सळसळून भिजली पाने
मज करतील सजल इशारा

रे तुझिया सामर्थ्याने
मी कसे मला विसरावे
अन् रंगांचे गंधांचे
मी गीत कसे गुंफावे

शोधीत धूक्यातून मजला
दवबिंदू  होऊनी ये तू
कधी भिजलेल्या मातिचा
मृदू सजल सुघांधीत हेतू

तू तुलाच विसरून यावे
मी तुझ्यात मज विसरावे
तू हसत मला फुलवावे
मी नकळत आणि फुलावे

 ह्या अफाट कल्पनेला माझा सलाम.....सलाम .......मंगेश पाडगावकर ह्यांना